កូលេស្តេរ៉ុលគឺជាសមាសធាតុលីពីតឬសារធាតុខ្លាញ់មួយដែលដើរតួយ៉ាងសំខាន់ក្នុងដំណើរការរាងកាយ។ ប៉ុន្តែការដែលមិនបានរក្សាកម្រិតកូលេស្តេរ៉ុលឱ្យមានតុល្យភាពនោះអាចបណ្តាលឱ្យមានបញ្ហាសុខភាពជាច្រើន ជាពិសេសជំងឺបេះដូង។ នៅក្នុងអត្ថបទនេះ ពួកយើងចង់បង្កើនការយល់ដឹងអំពីប្រភេទនៃកូលេស្តេរ៉ុល, កត្តាដែលបង្កឱ្យមានភាពប្រែប្រួលទៅលើកម្រិតកូលេស្តេរ៉ុល, អាហារដែលកាត់បន្ថយកម្រិតកូលេស្តេរ៉ុល និងផលប្រយោជន៍នៃការហាត់ប្រាណទៅលើកូលេស្តេរ៉ុល។
1. ប្រភេទកូលេស្តេរ៉ុល
កូលេស្តេរ៉ុលមាន2ប្រភេទសំខាន់ៗ។ កូលេស្តេរ៉ុលប្រភេទLDL មានតួនាទីក្នុងការដឹកជញ្ជូនកូលេស្តេរ៉ុលពីថ្លើមទៅកាន់កោសិកាដទៃទៀតនៃសារពាង្គកាយ។ ប៉ុន្តែការផ្ទុកនូវកូលេស្តេរ៉ុលប្រភេទLDLលើសកម្រិតអាចបណ្តាលឱ្យស្ទះសរសៃឈាមដែលអាចឈានទៅដល់ជំងឺបេះដូងធ្ងន់ធ្ងរ។ ប្រភេទកូលេស្តេរ៉ុលមួយប្រភេទទៀតនោះគឺHDL ដែលគេច្រើនសម្គាល់វាថាជាប្រភេទកូលេស្តេរ៉ុលដែលល្អ។ វាមានតួនាទីក្នុងការរំលាយសារជាតិកូលេស្តេរ៉ុលដែលមានលើសនៅក្នុងសរសៃឈាម ហើយកាត់បន្ថយហានិភ័យនៃជំងឺគាំងបេះដូង។
2. កត្តាដែលបង្កឱ្យមានភាពប្រែប្រួលទៅលើកម្រិតកូលេស្តេរ៉ុល
ការយល់ដឹងពីកត្តាណាខ្លះដែលអាចធ្វើឱ្យកម្រិតកូលេស្តេរ៉ុលរបស់អ្នកប្រែប្រួលគឺជាគន្លឹះដ៏សំខាន់ដើម្បីជួយអ្នកក្នុងការគ្រប់គ្រងវា។ កត្តាទាំងនោះរួមមាន៖
របបអាហារ និងកូលេស្តេរ៉ុល៖ ការសិក្សាជាច្រើនមកហើយបានបង្ហាញថា របបអាហារដែលពោរពេញទៅដោយជាតិខ្លាញ់ឆ្អែតតែងជាហេតុដែលធ្វើឱ្យមានការកើនឡើងនៃកម្រិតកូលេស្តេរ៉ុល។
តួនាទីរបស់ហ្ស៊ែន៖ ជំងឺតំណពូជមួយចំនួនអាចជាមូលហេតុដែលបង្កឱ្យមានការកើនឡើងនៅកូលេស្តេរ៉ុលប្រភេទLDL និងការកកើតនៃជំងឺបេះដូងទាំងវ័យក្មេង។
របៀបរស់នៅ៖ របៀបរស់នៅរបស់អ្នកគឺជាកត្តាដ៏ធំមួយដែលអាចផ្តល់ផលប៉ះពាល់ដល់កម្រិតកូលេស្តេរ៉ុលអ្នក។ ទម្លាប់ជក់បារី ពិសាគ្រឿងស្រវឹង និងការចូលចិត្តនៅតែស្ងៀមមួយកន្លែងគឺជាកត្តាចំបងដែលធ្វើឱ្យកើនកូលេស្តេរ៉ុល។
កត្តាអរម៉ូន៖ អរម៉ូន Estrogen ដែលមានក្នុងរាងកាយស្រ្តី
និងTestosterone ដែលមានក្នុងរាងកាយបុរសគ្រប់គ្រងសារជាតិកូលេស្តេរ៉ុលក្នុងរាងកាយមិនដូចគ្នានោះទេ។ នេះជាមូលហេតុដែលបង្កឱ្យមានភាពខុសគ្នារវាងកូលេស្តេរ៉ុលក្នុងរាងកាយបុរស និងកូលេស្តេរ៉ុលក្នុងរាងកាយស្ត្រី។
3. អាហារដែលកាត់បន្ថយកម្រិតកូលេស្តេរ៉ុល
ការសិក្សាជាច្រើនបានបង្ហាញថាចំណីអាហារទាំងនេះមានផ្ទុកនូវសមាសធាតុដែលអាចកាត់បន្ថយកូលេស្តេរ៉ុលបាន។ អាហារមានដូចជា៖
ស្រូវសាលី៖ មានផ្ទុកនូវសារជាតិ Beta-Glucan ដែលអាចកាត់បន្ថយកូលេស្តេរ៉ុលប្រភេទLDL ដោយកាត់បន្ថយការស្រូបយកកូលេស្តេរ៉ុលពីពោះវៀន
គ្រាប់ធញ្ញជាតិ៖ ការធ្វើតេស្តតាមគ្លីនិកបានបង្ហាញថា គ្រាប់ធញ្ញជាតិជាពិសេសគ្រាប់អាល់ម៉ុន និងគ្រាប់វ៉ាល់ណាត់អាចកាត់បន្ថយកូលេស្តេរ៉ុលប្រភេទLDLឬខ្លាញ់មិនល្អបានយ៉ាងច្រើន
ខ្លាញ់ត្រី៖ គឺជាខ្លាញ់ដែលធ្វើឱ្យមានកំណើនកូលេស្តេរ៉ុលប្រភេទHDL និងការថយចុះទ្រីគ្លីសេរីត
4. ផលប្រយោជន៍នៃការហាត់ប្រាណលើកូលេស្តេរ៉ុល
ការសិក្សាស្រាវជ្រាវជាច្រើនបានបង្ហាញឱ្យឃើញពីផលប្រយោជន៍របស់ការហាត់ប្រាណទៅលើការគ្រប់គ្រងកម្រិតកូលេស្តេរ៉ុល។ ការហាត់ប្រាណដូចជា៖
លំហាត់ប្រាណអេរ៉ូប៊ីក៖ ដែលមានដូចជាការរត់ ជិះកង់ និងការហែលទឹកអាចធ្វើឱ្យកម្រិតកូលេស្តេរ៉ុលប្រភេទHDL កើនឡើងហើយអាចជួយបន្ទាបកូលេស្តេរ៉ុលប្រភេទLDL
លំហាត់ប្រាណលើកទម្ងន់៖ អាចធ្វើឱ្យទម្រង់នៃសារជាតិកូលេស្តេរ៉ុលរបស់អ្នកប្រសើរឡើងតាមរយៈការកាត់បន្ថយកូលេស្តេរ៉ុលប្រភេទLDL និងទ្រីគ្លីសេរីត
លំហាត់ប្រាណលាយបញ្ចូលគ្នា៖ គឺជាការលាយគ្នារវាងលំហាត់ប្រាណអេរ៉ូប៊ីក និងលំហាត់ប្រាណលើកទម្ងន់។ វាផ្តល់ប្រយោជន៍ច្រើនជាងការធ្វើលំហាត់ប្រាណតែមួយមុខ។
ការយល់ដឹងទូលំទូលាយពីកម្រិតកូលេស្តេរ៉ុលអាចជួយក្នុងការគ្រប់គ្រង ហើយក៏អាចការពារខ្លួនអ្នកពីជំងឺបេះដូងជាច្រើនទៀតផងដែរ។ ដើម្បីទទួលបានលទ្ធផលដែលអ្នកចង់បាន នោះអ្នកគួរតែយកចិត្តទុកដាក់ក្នុងការដាក់បញ្ចូលរបបអាហារសុខភាព និងការហាត់ប្រាណទៀងទាត់។ បើសិនជាអ្នកត្រូវការការគ្រប់គ្រងបន្ថែមទៅលើកម្រិតកូលេស្តេរ៉ុលរបស់អ្នកនោះ អ្នកគួរតែពិគ្រោះយោបល់ជាមួយនឹងគ្រូពេទ្យជំនាញបន្ថែមដើម្បីស្វែងរកវិធីដែលគួរធ្វើបន្ត។
ប្រភព៖ https://www.nestacertified.com/lifestyle-changes-to-improve-your-ldl-cholesterol-levels/
