ទម្លាប់គេង៥យ៉ាងដែលអ្នកគួរអនុវត្តដើម្បីឱ្យគេងយប់លក់ស្កប់ស្កល់
តើអ្នកទទួលទានដំណេកមិនគ្រប់គ្រាន់នៅពេលយប់មែនទេ? តើអ្នកមានបញ្ហាក្នុងការគេងលក់ឱ្យបានស្កប់ស្កល់មែនទេ? តើអ្នកចង់ធ្វើឱ្យអារម្មណ៍ ការផ្ចង់អារម្មណ៍ ការចងចាំ និងសុខភាពទូទៅកាន់តែប្រសើរឡើងមែនទេ? ការគេងលក់បានស្កប់ស្កល់នៅពេលយប់ជួយឱ្យយើងធ្វើការបានល្អនៅពេលថ្ងៃ។ ទាំងនេះជាគន្លឹះសាមញ្ញៗចំនួន5 ដែលអ្នកអាចសាកល្បងបានដើម្បីឱ្យគេងលក់ស្កប់ស្កល់។
1. ទម្លាប់គឺជាកត្តាចម្បង - ត្រូវចូលគេងឱ្យបានទៀងទាត់
តើអ្នកមានដឹងទេថាការចូលគេងទៀងទាត់តាមម៉ោងអាចជួយឱ្យការគេងរបស់អ្នកកាន់តែប្រសើរ។ កតា្តសំខាន់នោះគឺអ្នកត្រូវរក្សាភាពច្បាស់លាស់នឹងខ្លួនឯង។ ការចូលគេងនៅពេលដែលងងុយគេងក៏ជាកត្តាមួយដ៏សំខាន់ដែរ ពីព្រោះប្រសិនបើអ្នកចូលគេងទាំងខ្លួនមិនទាន់ងងុយ នោះវាអាចបណ្តាលឱ្យមានការរំខានក្នុងការគេង។ ប្រសិនបើអ្នកចង់ផ្លាស់ប្តូរម៉ោងចូលគេង អ្នកគួរតែផ្លាស់ប្តូរវាបន្តិចម្តងៗ។ សាកល្បងចូលគេង15នាទីមុន ឬក្រោយម៉ោងចូលគេងធម្មតា។
ការក្រោកពីគេងទៀងទាត់រៀងរាល់ថ្ងៃក៏អាចធ្វើឱ្យការទទួលទានដំណេករបស់អ្នកកាន់តែប្រសើរផងដែរ។ ការធ្វើបែបនេះវាជួយរក្សានាឡិកានៅក្នុងរាងកាយឱ្យមានស្ថេរភាព។
2. បិទអេក្រង់របស់អ្នកមុនពេលចូលគេង
អេក្រង់គឺជាសត្រូវនៃការគេងលក់ស្កប់ស្កល់។ អេក្រង់រួមមានអេក្រង់ទូរសព្ទ ទូរទស្សន៍ កុំព្យូទ័រ និងម៉ាស៊ីនលេងហ្គេម។ កាំរស្មីពណ៌ខៀវដែលបញ្ចេញដោយឧបករណ៍ទាំងនេះអាចធ្វើឱ្យនាឡិកាក្នុងរាងកាយរបស់អ្នកយល់ច្រឡំ ហើយវារំខានដល់កម្រិតមេឡាតូនីន (ដែលជាអរម៉ូនដែលជួយក្នុងការគេងលក់) ហើយបណ្តាលឱ្យរាងកាយ និងអារម្មណ៍របស់អ្នកពិបាកក្នុងការគេងលក់។
ដើម្បីទទួលបានការគេងលក់ស្កប់ស្កល់ អ្នកគួរតែចៀសឱ្យឆ្ងាយពីកាំរស្មីដែលភ្លឺ ជាពិសេសកាំរស្មីពណ៌ខៀវ។ ខាងក្រោមនេះគឺជាការណែនាំខ្លះៗ៖
- បិទអេក្រង់របស់អ្នក 30នាទីមុនចូលគេង
- ប្តូរពីការមើលទូរសព្ទ មកការអានសៀវភៅវិញ - វាអាចជួយឱ្យរាងកាយ និងអារម្មណ៍អ្នកមានភាពស្ងប់
3. រៀបចំគ្រែគេងរបស់អ្នកឱ្យសមរម្យមានផាសុកភាព
គ្រែគេងរបស់អ្នកគឺជាទីជ្រកកោនដ៏មានផាសុកភាពបំផុត។ វាត្រូវតែមានភាពទាក់ទាញ ស្ងប់ ហើយពិសេសនោះត្រូវតែមានផាសុកភាព។ រាល់យប់ គ្រែគេងរបស់អ្នកត្រូវតែមានភាពកក់ក្តៅដើម្បីឱ្យអ្នកអាចគេងបាន 7 ម៉ោង ឬលើសពីនេះ។ ប្រសិនបើអ្នកមានភាពលំបាកក្នុងការចូលគេងនៅពេលដែលដល់ម៉ោងចូលគេងនោះ វាប្រហែលជាដល់ពេលដែលអ្នកត្រួវរៀបចំគ្រែគេងរបស់អ្នកឱ្យមានផាសុកភាពជាងមុនហើយ ដើម្បីឱ្យអ្នកគេងលក់លឿនជាងមុន ហើយស្កប់ស្កល់ជាងមុន។
4. ញុំាអាហារឱ្យឆ្អែតនៅពេលថ្ងៃ
មានឥរិយាបថញុំាអាហារខ្លះដែលអាចចូលរួមចំណែកឱ្យការគេងរបស់អ្នកមិនស្កប់ស្កល់ដូចជា
- ព្យាយាមចៀសវាងការញុំាអាហារដែលមានស្ករច្រើន ឬមានផ្ទុកសារជាតិធ្វើឱ្យនៅបានយូរ
- ចៀសវាងការទទួលទានជាតិអាល់កុល កាហ្វេអ៊ីន និងភេសជ្ជៈកម្លាំង 4 ទៅ 6 ម៉ោងមុនចូលគេង
- កុំចូលគេងទាំងនៅឃ្លាន
- កុំចូលគេងក្រោយពេលញុំាអាហារច្រើនព្រោះវាអាចបង្កភាពលំបាកដល់ការគេងយឺត
5. ធ្វើលំហាត់ប្រាណជារៀងរាល់ថ្ងៃ
ការធ្វើលំហាត់ប្រាណទៀងទាត់ផ្តល់អត្ថប្រយោជន៍ល្អៗជាច្រើនសម្រាប់សុខភាពផ្លូវកាយ និងផ្លូវចិត្ត។ អ្នកគួរធ្វើលំហាត់ប្រាណណាដែលបង្កើនចង្វាក់បេះដូង ដែលមានរយៈពេលយ៉ាងតិច 30នាទីក្នុងមួយថ្ងៃ។ បើអាចធ្វើទៅបាននោះ អ្នកគួរចៀសវាងការធ្វើលំហាត់ប្រាណយ៉ាងតិច 4 ម៉ោងមុនចូលគេងដោយសារវាអាចបណ្តាលអ្នកគេងមិនលក់។
https://www.sleepfoundation.org/mattress-information/how-to-make-your-bed-more-comfortable
